2025ean, Espainian 3.310.824 enpresa ari ziren jardunean, aurreko urtean baino % 1,7 gehiago, eta horrek enpresa-ehun dinamikoa islatzen du.
Espainiako enpresa ehunaren ezaugarri bat da mikroenpresak eta ETEak nagusitzen direla. Enpresen % 54,4k ez du soldatako langilerik, eta langile bat edo bi dituztenak barne sartuz gero, ehunekoa % 81,6ra igotzen da. Beste muturrean, enpresen % 5ek soilik ditu 20 langile edo gehiago, eta horrek mugatzen die kostuen igoerak xurgatzeko ahalmena.
Ikuspuntu sektorialetik begiratuta, honako jarduera hauek nabarmentzen dira: merkataritza-jarduerak (% 19), zerbitzu profesionalak (% 12,6) eta eraikuntza (% 12, gutxi gorabehera); industria, berriz, jardueren % 5 da, gutxi gorabehera. Sektore horiek intentsiboak dira enplegu aldetik, eta bereziki sentikorrak lan-kostuen eta arau-betebeharren aldaketen aurrean.
ETEek kontzentratzen dituzte enplegu gehienak, eta, hortaz, gizarte-kotizazioen edo lan-kostuen edozein aldaketak badu zuzeneko inpaktua lan-merkatuan. Enpresa-dinamismoak handia izaten jarraitzen du, zeren iaz 395.000 enpresa sortu baitziren; itxi egin zirenak, berriz, 324.000 izan ziren. Eraikuntzak eta higiezinen sektoreak gidatu zuten sorkuntza garbia; txikizkako merkataritza, aldiz, doikuntza handiagoa izan zuen.
Beste alde batetik, Sozietateen gaineko Zergari dagokionez, 2026an fiskalitate bereizia mantenduko da. Tasa orokorra % 25ean mantentzen da (% 23ra jaisten da milioi bat euro eta 10 milioi euro bitarteko fakturazioa dutenentzat; milioi bat eurotik beherako negozio-zifra duten enpresei dagokienez, haien tasa % 21 da zergen aurreko mozkinaren lehenengo 50.000 €-en gainean, eta % 22koa gainerakoaren gainean. Sorkuntza berriko enpresek % 15eko tasa murriztua aplikatzen dute zerga-oinarri positiboa duen lehenengo ekitaldian eta hurrengoan. Tamaina handiagoko enpresa jakin batzuentzat, % 15eko tasa minimo efektiboa mantentzen da, baina hori ez zaie aplikatzen miloi bat eurotik beherako fakturazioa duten ETEei.
Gizarte-kotizazioei dagokienez, 2026k lan-kostuaren igoera dakar. Belaunaldi arteko Ekitate Mekanismoa (MEI) % 0,9ra iristen da, % 0,75 enpresaren konturakoa izanik. Gehieneko kotizazio-oinarria % 4 inguru hazten da, hilean 5.1010,20 €-ra iritsiz; horrek soldata ertain eta handietan du bereziki eragina. Gainera, elkartasun-kuota finkatzen da gehieneko oinarria gainditzen duten ordainsarietarako, % 1,15, % 1,25 eta % 1,46ko tasekin, tartearen arabera.
Merkataritzaren arloan, VERIFACTU sistemaren garapenak jarraitzen du, trazabilitatea eta fakturazioaren kontrola indartzeko xedez. Haren derrigorrezko ezarpena atzeratu bada ere, enpresek euren fakturazio-sistemak egokitu beharko dituzte modu progresiboan, zeren betebeharra ez baita desagertzen, baizik eta atzeratzen.
