Urte berria, kotizazio berria. 2026an, Erregimen Orokorraren kotizazio-oinarriak gorantz eguneratuko dira, 2025ekoen aldean, bai gutxieneko oinarrian eta bai gehieneko oinarrian. Gutxieneko oinarriari dagokionez, 2026an 1.381,20 €-koa izango da hilean (2025ean, 1.260 €-koa zen); beraz, oinarri hau % 9,6 igo da, gutxi gorabehera. Eguneraketa horrek bermatzen du ezein kotizazio-oinarri ez dela geratuko legezko gutxieneko mugaren azpitik (zeren Lanbide arteko Gutxieneko Soldata gehi seiren bat baita). Gehieneko kotizazio-oinarria, berriz, 2025ean 4.909,50 €-koa izatetik –hilean- 2026ean 5.101,20 €-koa izatera pasatu da, eta, hortaz, % 4 igo da, gutxi gorabehera.
Bestalde, 2026ean mantendu egingo da langile autonomoen (LAAB) kotizazio-sistema, errendimendu garbiei dagokienez, kotizazio-oinarriek eboluzio bereizia izanik 2025ekoen aldean. Eskura dauden estimazioen arabera, aldaketak honela laburbildu daitezke:
- Hilean errendimendu garbi txikiak (1.166,70 €-raino, gutxi gorabehera) dituzten autonomoak: kotizazio-oinarriak aldaketarik gabe mantentzen dira, hau da, 2025ean bezala jarraitzen dute; beraz, izatez izozketa bat dago tarte baxuenetan.
- Errendimendu garbi ertainak eta handiak dituzten autonomoak (hilean 1.16,70 €-tik hasita): gutxieneko oinarriak modu progresiboan igotzen dira, % 1 eta % 2 bitarteko igoera estimatuekin, 2025ekoen aldean, sarreren tartearen arabera.
LAABaren gehieneko oinarria, berriz, sistemaren gehieneko muga orokorra bezala eguneratzen da, hau da, 5.101,20 €-koa izango da hilean; beraz, % 4 inguru igotzen da 2025ekoaren aldean.
Beste alde batetik, aldaketen eraginez, kotizazio-tasak gora egiten du Belaunaldi arteko Ekitate Mekanismoan (% 0,1 gehitzen da eta % 0,9an geratzen da) eta Elkartasun-kuotan; azken horretan, kotizazio-tasa berriak finkatzen dira, gehieneko kotizazio-oinarria gainditzen duen ordainsari-zatiari aplikatzeko (% 1,15, gehieneko oinarri-tasa % 10eraino gainditzen duen tarterako; % 1,25, % 10 eta % 50 bitarteko zenbateko erantsia duen tarterako; eta % 1,46, gehieneko oinarria % 50az baino gehiagoz gainditzen duen tarterako).
