2026tik aurrera, autonomo sozietarioek eta senide laguntzaileek nobedade esanguratsu bat dute kotizazioaren alorrean: aplikatzekoa den gutxieneko oinarria 2025ean erabiltzen zen muga utzi du atzean, hots, 1.000 euro hilean; izan ere, orain 1.424,40 euro izatera pasatu da hilean.
2025eko Kotizazioari buruzko aginduak ezartzen zuenez: senide laguntzaileek eta autonomo sozietario jakin batzuek ezin aukera zezaketen 1.000 eurotik beherako oinarririk, ekitaldi horretan. 2026an, berriz, PJC/297/2026 Agindu berriak 1.424,40 euroko gutxieneko oinarria ezartzen du, hilean, Erregimen Orokorreko 7. Taldearentzat; eta Gizarte Segurantzaren Lege Orokorrak kolektibo horiek lotzen ditu 7. taldearen gutxieneko oinarri horrekin.
Aldaketa esanguratsua da, nonbait. Izan ere, 424,40 euroko igoera dakarkio hileko gutxieneko oinarriari, hau da, % 44,44 igoera lehengo 1.000 euroen aldean. Gainera, 2026ko Aginduak ezartzen ditu LAABean aplikatzekoak diren tasak: % 18,30 kontingentzia arruntengatik; % 1,30 lanbide-kontingentziengatik; % 0,90 Belaunaldi arteko Ekitate Mekanismoagatik; % 0,90 jarduera uztegatik; eta % 0,10 lanbide-heziketagatik.
Alor praktikoan, igoera horren ondorioa da autonomo sozietario eta senide laguntzaile askok kotizazio-karga handiagoa hartu beharko dutela hilero euren gain. Eta oinarri handiagoak etorkizuneko prestazio batzuk hobetu baditzake ere, presio handiagoa ere dakar negozioaren altxortegira, batez ere sozietate txikietan, familia-negozioetan eta berez marjina txikia duten jardueretan.
Aldaketa hori ikuspegi bikoitzez aztertu behar da. Alde batetik, kotizazio publikoak jarraitzen du autonomoaren babes-oinarria izaten, besteak beste kontingentzia hauen aurrean: erretiroa, aldi baterako ezintasuna, ezintasun iraunkorra edo heriotza. Beste alde batetik, babes horrek ez die beti erantzuten autonomoaren benetako behar guztiei, ezta bere familiarenei edo lan egiten duen sozietatearenei ere.
Autonomo sozietarioa ez da kotizatzen duen pertsona bat soilik. Kasu askotan, horrez gain bazkidea, administratzailea, gerentea edo abal-emailea ere bada, eta baita diru-sarreren iturri nagusia eta enpresaren jarraitutasunerako funtseko figura ere. Baja luzea edo ezintasun iraunkorra pairatzen badu, edo hil egiten bada, inpaktua dagokion prestazio publikotik baino askoz ere harago joan daiteke.
Horregatik, kotizazioaren 2026ko igoera aukera ona izan daiteke autonomoaren babes globala berraztertzeko. Ez da aski jakitea zenbat ordaintzen zaion Gizarte Segurantzari. Orobat, komenigarria da galdetzea zer diru-sarrera maila geratuko litzatekeen babestuta, zer gertatuko litzatekeen familiarekin, nola erantzungo lukeen enpresak bazkide nagusia falta bada, eta zer likidezia beharko litzatekeen egoera kritiko batean.
Testuinguru horretan, aseguru pribatuek babes osagarri gisa funtziona dezakete. Ezintasun iraunkorreko aseguruak kapital bat eskain dezake autonomoak ezin badu bere jarduera garatzen jarraitu. Bizi-aseguruak familia babes dezake, zorrak estali ditzake edo sozietatearen jarraitutasuna erraztu. Eguneko baja-asegurua lagungarria izan daiteke diru-sarreren jaitsiera konpentsatzeko, aldi baterako ezintasunak dirauen bitartean. Eta aurrezpen- edo aurreikuspen-soluzio bat zure etorkizuneko erretiroaren osagarria izan daiteke.
Gakoa da ez pentsatzea kotizazioa berez nahikoa den babes bat dela. Gehiago kotizatzeak prestazio batzuen kalkulatzeko erabiltzen den oinarria hobetu dezake, baina ez ditu ezabatzen autonomo sozietarioaren baja, ezintasun edo heriotzatik ondorioztatzen diren arrisku ekonomiko guztiak.
Gainera, sozietate txikietan, arazoa ez da beti pertsonala soilik izaten. Autonomo sozietarioa baldin bada zuzendu, saldu, bankuekin negoziatu edo bezero estrategikoekiko harremana mantentzen duena, edozein kontingentzia larrik zuzeneko eragina izan dezake negozioaren iraupenean.
Horregatik, 2006 ez litzateke hartu behar kostuak igotzen dituen urtetzat soilik. Izan ere, horrez gain une egokia izan daiteke berraztertzeko ea autonomoaren babesa bat ote datorren enpresaren barruan benetan duen ardurarekin.
Azken batean, autonomo sozietarioei eta senide laguntzaileei aplikatzen zaien gutxieneko kotizazio-oinarri berriak aldaketa esanguratsua dakar Gizarte Segurantzaren hileko kostuan. Baina funtsean dagoen galderak beste bat izaten jarraitzen du: autonomoa negozioaren funtsezko pieza bat baldin bada, babestuta ote daude haren diru-sarrerak, haren familia eta enpresaren jarraitutasuna kontingentzia larri baten aurrean?
